E bujshme, Gazmend Demi dhe Olsi Rama dëshirojnë të blejnë Salernitanën. Klubi nga Salerno është në pronësi të presidentit të Lazios Claudio Lotito por ky i fundit ka vendosur ta nxjerrë në shitje Salernitanën pasi po synon të blejë kompaninë ajrore Alitalia dhe ka nevojë për të ardhura. Duke iu referuar asaj që shkruan salernogranata.it janë dy grupe biznesmenësh që interesohen dhe njëri prej tyre është grupi shqiptar që përbëhet nga presidenti i Partizanit Gazmend Demi dhe vëllai i kryeministrit të Shqipërisë Olsi Rama. Mbetet për t’u parë nëse Lotito do ta shesë përfundimisht Salernitanën dhe nëse interesimi i dyshes Demi-Rama është i vërtetë, por siç thotë një shprehje popullore, “ku ka zë nuk është pa gjë”, dhe për më tepër fakti që Lotito bashkëpunon prej kohësh me Taren mund të ndikojë pozitivisht në bisedimet mes palëve. Salernitana që arriti të siguronte qëndrimin në Serie B nëpërmjet fazës play-out vlerësohet rreth 16 milionë euro.
“Grupi i parë që interesohet është italian, ndërsa grupi i dytë është shqiptar. Ky i fundit kryesohet nga Olsi Rama, vëllai i kryeministrit shqiptar dhe aktualisht drejtor i përgjithshëm i Partizanit të Tiranës, që këtë sezon arriti të shpallej kampion pas 20 vitesh. Presidenti i klubit shqiptar, përveç të tjerash është edhe mik i ish-drejtorit të përgjithshëm të Juventusit, Luciano Moggi. Grupi i shqiptarëve në ditët në vijim pritet që të formulojë një ofertë konkrete. Me 16 milionë euro marrëveshja mund të mbyllet, ndonëse në muajt e kaluar Lotito pat refuzuar disa propozime konkrete për shitjen e klubit”, shkruan portali www.salernogranata.it.