Tifozët që presin të shohin në krye të skuadrës së tyre Diego Pablo Simeonen, duhet të kenë mbetur shumë të zhgënjyer nga vendimi fundit i “El Cholos” për të ardhem e tij. Trajneri argjentinas ka vendosur të rinovojë kontratën me Atleticon e Madridit, me aktualen që përfundon në qershor të vitit 2020.
Sipas “Marca”-s, bisedimet që kanë nisur verën e kaluar shumë shpejt do të mbyllen me nënshkrimin e kontratës së re, që do ta bëjë trajnerin pjesëtarin më të paguar të klubit.
Madje Simeone do të fitojë edhe më shumë se Antoine Griezmann, që e rinovoi kontratën e tij gjatë Botërorit “Rusi 2018” me një page rreth 20 milionë euro në vit, duke zhgënjyer tifozët e Barcelonës, që po e prisnin me padurim.
Ky ndoshta është ndër rastet më të rralla, për të mos thënë i vetmi, që trajneri vlerësohet sa i përket pagës edhe më mirë se “ylli” i skuadrës.
Në kontratën e Simeones është shtuar një klauzolë, sipas së cilës, trajneri mund të largohet nëse klubi nuk e respekton marrëveshjen në tërësinë e saj.