PSG zgjodhi Christophe Galtier si zëvendësuesin e Mauricio Pochettinos. Kampionët e Francës nënshkruan një kontratë 2-vjeçare me 56-vjeçarin, i cili po bën mirë në stolin e ekipit kryeqytetas, që nuk ka pësuar asnjë humbje deri në këtë fazë të sezonit.
Kylian Mbappe është tema e momentit te PSG, media të ndryshme flasin për një largim të sulmuesit, ndërkohë që gazetari francez Dominique Severac ka “zbuluar” edhe pasardhësin e Galtier në pankinën e PSG-së.
“Nuk e di se kur, por trajneri i ri i PSG-së do të jetë Ruben Amorim”, deklaroi Severac për RTL. Amorim është vetëm 37 vjeç, si futbollist luante si mesfushor duke ia dalë të vishte 14 herë fanellën e kombëtares portugeze.
Prej 5 marsit të vitit 2020 drejton Sportingun e Lisbonës, ekip me të cilin fitoi titullin kampion në Portugali sezonin e kaluar, Kupën (2x) dhe Superkupën e Portugalisë. Amorim ia doli ta fitonte Kupën e Portugalisë edhe si trajneri i Bragës.
