Andrea Martínez, ish-basketbolliste dhe “Miss Universe Spain 2020”, është partnerja e portierit spanjoll Kepa Arrizabalaga. Modelja tregoi gjithë mbështetjen e saj për të dashurin, pas dështimit të tij në ekzekutimin e penalltisë që i kushtoi Chelsea-t humbjen e finales së Carabao Cup përballë Liverpollit.
“Një nga gjërat që mësova kur isha basketbolliste ishte se një ekip është gjithmonë një ekip. Nuk ka heronj, as fajtorë. Për mendimin tim personal, kjo është një situatë shumë e padrejtë dhe nuk po flas vetëm për sot. Kepa, ne jemi shumë krenarë për ty, si portier dhe më shumë si person”, ishte mesazhi i Andreas në rrjetet sociale.