Ashtu si Italia, edhe Spanja është gjunjëzuar para pandemisë së Koronavirusit. Janë me mijëra të vdekurit në vendin iberik, por më i dhimbshëm është fakti që ka nga ata që nuk gjejnë trupat e të afërmve të tyre. Dhe kur i ndodh djalit të ish-presidentit të Real Madridit…
I biri i Lorenzo Sanz, i cili ndërroi jetë për shkak të prekjes nga Koromavirusi më 21 mars, gjatë një interviste në programin “Salvame” të TeleCinco zbuloi se trupi i babait të tij nuk dihet ku është. Ai bën thirrje që çështja të zbardhet dhe të vijojë procesi i djegies së trupit.
“Gazzetta dello Sport” shpjegon se ideja fillestare ishte për të çuar në krematorium më 24 mars, por ceremonia u shty për shkak të kolapsit të institucioneve të funeralit në Madrid, si pasojë e numrit shumë të lartë të vdekjeve.
Meqë ishte e pamundur që procesi të bëhej në varrezat e San Isidoro, trupi i pajetë i Lorenzo Sanz u nis drejt Escorial, por, sot, djali i ish-presidentit të Real Madridit thotë se nuk mbërriti kurrë dhe se askush nuk e di se ku ndodhet.