Ndonëse thuajse të gjitha skuadrat e mëdha zbritën në fushë gjatë ditës së djeshme, duke ofruar një të shtunë spektakolare për futboll-dashësit, edhe e diela propozon sërish disa takime interesante.
Kështu në Serinë A vëmendja do të jetë në Reggio Emilia, ku Milani do të udhëtojë për t’u përballur me Sassuolon, me synimin e vetëm që të lërë pas problemet në takimet e fundit dhe të rikthehet te fitorja.
Kuqezinjtë vijnë me një sërë problemesh në repartin e sulmit, pasi Higuain nuk është grumbulluar dhe Cutrone ka probleme, ndaj vështirë se do të mund ta nisë takimin nga fillimi, megjithatë Gattuso ka ngulmuar që të tijtë të kthehen me 3 pikë nga kjo transfertë.
Një tjetër sfidë interesante që propozon kampionati italian, është ajo e “Artemio Franchit” në Firence, ku Fiorentina vendase do të presë Atalantën e Gasperinit. Të dy skuadrat janë duke treguar një futboll mjaft të bukur dhe do të diskutojnë një vend në Europa League këtë sezon, gjë që e bën edhe më interesante këtë sfidë.
Kampionati francez vjen sot me tre takime, por natyrisht që vëmendja do të jetë e përqendruar te ai i mbrëmjes, ku Lille do të presë Olympic Marseillen, në një sfidë që premton spektakël, rivalitet dhe gola.