Mirel Josa konfirmohet në krye të Prishtinës, deri në momentin që presidenti Remzi Ejupi të përfundojë pushimet. Pavarsisht eliminimit në turin paraeliminator të Europa League nga modestët e St Josephs nga Gjibraltari, trajneri kryeqytetas do të vazhdojë aventurën e tij në krye të bardhekaltërve. Ka qenë vetë klubi i Prishtinës me një postim në faqen zyrtare në Facebook, që ka bërë publik qëndrim e Mirel Josës, ndërkohë që klubi kosovar përgënjeshtron të gjithë atë tifozë që aluduan për trukimin e ndeshjes së kthimit ndaj St Josephs.
Komunikata e klubit të Prishtinës:
Prishtinë, 4 korrik 2019 – Mirel Josa qëndron kryetrajner i Prishtinës. Vulën do të jap kryetari Ejupi, i cili ka eksluzivitetin me mandat nga statuti, pasi që të rikthehet nga pushimi.Josa ka mbështetjen maksimale të pothuajse 99% të futbollistëve. Përforcimet që i ka bërë Prishtina, lojtarët e ardhur, në negociata me klubin, gjithmonë dhe të gjithë kanë shprehur haptas se Prishtinën, ndër tjera, e zgjedhin për shkak cilësive dhe punës që bënë profesor Josa.
Për FC Prishtina, gjithmonë e rëndësishme ka qenë uniteti i grupit, i futbollistëve dhe shtabit teknik dhe besimi që kanë në mes tyre.Tifozëve të vërtet të klubit u themi, se FC Prishtina është në rrugë të drejt dhe njëkohësisht i falënderojmë për besimin, atyre dhe të gjithë dashamirëve të vërtet të klubit, nga ish-futbollistë e deri te ish-trajnerët që me ngulm në orët e fundit na kanë dhënë mbështetje të shqetësuar nga lajme të orkestruara.
