Liridon Kukaj është rikthyer te Prishtina. Ish-qendërmbrojtësi i njohur dardan, ka nisur aventurën e tretë tek ekipi bardhekaltër, dhe të parën si trajner.
39-vjeçari është përzgjedhur trajneri i ekipit U19. Krahas Prishtinës Kukaj do të vijojë punën si ndihmësi i Afrim Tovërlanit te përfaqësuesja U21 e Kosovës.
Gjatë karrierës si futbollist, Kukaj zhvilloi 185 ndeshje me Prishtinën, ekip ku mbante shiritin e kapitenit. Ai ia doli të fitojë titullin, Kupën dhe Superkupën e Kosovës në kryeqytet. Kukaj gjithashtu ka luajtur në Shqipëri me Vllazninë dhe Gramozin.
KOMUNIKATA E PRISHTINËS
Prishtina vazhdon të afrojë disa nga ish-yjet e skuadrës, të cilët kanë dhënë kontribut të jashtëzakonshëm për ekipin “bardhekaltër”.
Liridon Kukaj është personi i radhës që është rikthyer në skuadër, kësaj radhe pak metra larg fushës së gjelbër, në pozitën e trajnerit të FC Prishtinës U19.
Ai rikthehet te FC Prishtina pas propozimit të drejtorit sportiv, Driton Krasniqi. 39-vjeçari te Prishtina do ta zëvendësojë trajnerin Agim Maliqi, i cili i është bashkuar stafit të Ismet Munishit te skuadra e parë. Kukaj në stinorin e kaluar punoi si ndihmës i Bekim Shotani te FC Drenica.
Kukaj ka pasur karrierë të bujshme në futbollin e Kosovës, ku përveç Prishtinës, ai ka luajtur edhe në Shqipëri te Vllaznia e Shkodrës dhe tashmë te klubi i shuar, Gramozi.
Kukaj ka regjistruar me Prishtinën 185 ndeshje zyrtare në tri gara, duke shënuar edhe 12 gola kampional.
Rikthimi në shtëpi është gjithmonë i ëmbël. Po ndjehem shumë mirë. Tashmë na pret një punë e madhe dhe besoj se do ta arsyetoj besimin e dhënë nga drejtuesit e klubit më të madh në Kosovë, deklaroi Kulaj, pasi nënshkroi kontratën.
