Besart Ibraimi është golashënuesi më i mirë në historinë e futbollit në Maqedoninë e Veriut. 35-vjeçari nga Kërçova zhvilloi gjashtë sezone fantastike me Shkëndijën e Tetovës (2015-2021), duke fituar dy tituj kampionë dhe po kaq Kupa të Maqedonisë së Veriut me kuqezinjtë, klub ku mban rekordin sa i përket golave.
Sulmuesi shqiptar, i cili ka veshur 15 herë fanellën e kombëtares së Maqedonisë së Veriut, ishte pjesë e grekëve të AO Xanthi në sezonin e fundit, gjatë së cilit realizoi katër gola në 13 ndeshje. Emri i tij u lidh me një kalim të mundshëm te Partizani, por Ibraimi ka vendosur të rikthehet në futbollin maqedonas.
Goleadori ka takuar dje drejtuesit e Struga Trim Lum, klubi shqiptar që garon në elitën e futbollit të Maqedonisë së Veriut, dhe palët kanë rënë parimisht dakord. Zyrtarizimi i transferimit tek ekipi i ri ka ardhur nga postimi i Strugës në faqen zyrtare. Ibraimi ka provuar më parë edhe disa aventura në Gjermani, Ukrainë dhe Qipro.
