Vllaznia sezonin e ardhshëm nuk do të jetë në Superiore e me shumë mundësi edhe ish-kapiteni i saj Ndriçim Shtubina. Mesfushori që sezonin e kaluar mbrojti ngjyrat e Kukësit dhe më pas të Laçit, ku u transferua në janar, ka zgjidhur marrëveshjen me skuadrën kurbinase për të nisur një aventurë të re.
Destinacioni i radhës pritet të jetë Superliga e Kosovës. Aty e pret Gugash Magani. Tekniku që kërkon të ndërtojë një skuadër të aftë për ambiciet madhore të Trepca ‘89 e konsideron 31-vjeçarin një lojtar me profilin ideal për skemat e tij, ndaj i ka bërë Shtubinës një ofertë shumë të mirë edhe në aspektin financiar.
Vetë futbollisti ndihet i joshur nga ideja për të provuar një eksperiencë të re në Kosovë, mbi të gjitha ideja për të punuar me një teknik si Magani i pëlqen së tepërmi, ashtu si dhe situata financiare që gjen atje. Palët kanë arritur në parim akordin dhe mbetet vetëm hedhja e firmave për të zyrtarizuar transferimin, një formalitet i destinuar për t’u konkretizuar brenda pak ditësh.