Si 12-vjeçar, ishte zgjedhur lojtari më i mirë në kampin e organizuar në Prishtinë nga gjiganti italian, Milan. Shtatë vite më vonë, pikërisht Milan ia ka vënë syrin Edon Zhegrovës, i cili aktualisht është pjesë e skuadrës belge Genk.
Skautët e klubit kuqezi e kanë ndjekur me vëmendje supertalentin e lindur më 1999-ën duke e vlerësuar me nota shumë të larta cilësitë e tij. Zyrtari i lartë i Milanit, Leonardo është duke vlerësuar nëse ylli i përfaqësueses së Kosovës mund të zbarkojë në Milanello.Lajmi është bërë i ditur nga mediat italiane të cilat Zhegrovën e kanë cilësuar si “Messi i Kosovës”.
Supersport ka kontaktuar talentin nga Prishtina i cili as nuk e ka pohuar por as nuk e ka mohuar lajmin për interesimin e Milanit. Afati kalimtar i janarit mund të jetë një mundësi e artë për Zhegrovën që të largohet nga Belgjika për një kampionat më të fortë. Përveç kuqezinjëve për të ka interesim edhe nga shumë skuadra tjera europiane.
19-vjeçari i lindur në Gjermani nuk po gjen shumë hapsirë te Genk dhe largimi nga aty ndoshta do të ishte hap i rëndësishëm për karrierën e tij. Ai është pjesë e skuadrës së njohur belge që nga viti 2017 dhe në 19 paraqitje ka shënuar 2 gola.
Zhegrova nga viti 2018 është edhe pjesë e përfaqësueses së Kosovës ku ka arritur të realizojë 2 gola në gjashtë paraqitje.Ëndrra e tij është që një ditë të jetë pjesë e Barcelonës, por do të ishte diçka e jashtëzakonshme që fillimisht të bëhej pjesë e gjigantit italian, Milan.