Ndërkohë që vëmendja është në Shkodër për ndeshjen mes Vllaznisë e Teutës, klubi durrsak ka bërë një goditje në merkato, pasi ka nënshkruar me sulmuesin e mirënjohur shqiptar, Sebino Plaku.
Lajmi u konfirmua nga vetë presidenti i Teutës, Edmond Hasanbelliu, në një lidhje direkte me emisionin “Gol pas Goli” në Supersport, i cili tha se është mbyllur gjithçka dhe se sulmuesi do të vihet nën urdhrat e trajnerit Martini që nesër.
Tashmë 35-vjeçar, Plaku do të jetë një vlerë e shtuar për klubin durrsak, që është përforcuar vërtetë shumë dhe ka shfaqur hapur pretendimet për të fituar titullin kampion, por që në 12 javët e para ka vuajtur shënimin e golave.
Sebino Plaku ka një eksperiencë shumë të madhe në Shqipëri, pasi ka veshur fanellat e skuadrave si Partizani, Dinamo, Tirana, Skënderbeu, Laçi, Apolonia, Kamza, Kukësi dhe së fundi Kastrioti, pasi deri në fund të dhjetorit ishte pjesë e krutanëve.