Marsel Ismajlgeci nuk është më lojtari i Tiranës. “SuperSport” mëson se kapiteni është larguar nga ekipi dhe do të transferohet në Bosnja dhe Hercegovina te ekipi i Zrinjski Mostar, skuadër me të cilën Tirana u përball në eliminatoret e Europa Conference League. Nga ky transferim, Tirana do të përfitoj 150 mijë euro.
Ismajlgeci është largimi i dytë i rëndësishëm nga kampionët e Shqipërisë pas Redon Xhixhës, i cili do të vijojë karrierën në Azerbajxhan te Qarabag.
22-vjecari është produkt i akademisë së Tiranës dhe që prej sezonit 2020/2021 ka qenë titullar i padiskutueshëm për bardheblutë, duke dhënë kontributin e tij në fitimin e titullit kampion.
Edhe këtë sezon Ismajlgeci ka luajtur 16 sfida dhe largohet duke e lënë Tiranën në vendin e parë të renditjes me një pikë më shumë se vendi i dytë që mbahet nga Partizani.
Tirana është mjaft aktive në merkato, teksa ka zyrtarizuar afrimin e Regi Lushkjes dhe Kristal Abazajt. Ndërkohë nga ekipi është larguar Sherif Kallaku dhe pritet vetëm zyrtarizimi i Redon Xhixhës dhe Marsel Ismajlgecit si largimet e radhës nga “bardheblutë”.
