Klubi i famshëm argjentinas i River Plate-t hyn në librat e rekordeve të futbollit. “Los Millonarios” kishin plot 20 lojtarë të dëmtuar dhe të infektuar nga pandemia e Koronavirusit dhe ekipi i drejtuar nga trajneri i mirënjohur Marcelo Gallardo u shtrëngua për ta zhvilluar takimin e radhës pa asnjë llojtar të vetëm në stol. Natyrisht, krerët e klubit nga Buenos Airesi kërkuan me ngulm që takimi ndaj skuadrës kundërshtare nga Kolumbia, Santa Fe, të shtyhej, por drejtuesit e CONMEBOL-it nuk pranuan dhe nën presionin e ekipit nga Bogota Club Independiente Santa Fe vendosën që të respektohej data e përcaktuar në kalendar.
Sikur të mos mjaftonte stoli i zbrazur, pa asnjë futbollist në dispozicion, Riveri kishte probleme të jashtëzakonshme gjithashtu edhe në portë. Që të katër portierët e skuadrës së famshme argjentinase rezultuan të prekur me Virusin Covid – 19 dhe Marcelo Gallardo i dha besim mes shtyllave ish-mesfushorit të Benficas dhe Valencias, Enzo Perez.
Kërkesat e drejtuesve të ekipit nga Buenos Airesi për të regjistruar në Kupën Libertadores portierët e pestë dhe të gjashtë, për shkak të rrethanave krejtësisht të pazakonta, u hodhën poshtë nga drejtuesit e Konfederatës Amerikano – Jugore të Futbollit, kështu që trajnerit 45-vjeçar, dikur lojtar i Monacos dhe Paris SG nuk i mbeti gjë tjetër përvecse t’i veshte dorezat e portierit mesfushorit 35-vjeçar nga Mendoza.
Në Grupin D, skuadra nga Rio de Janeiro, Fluminense dhe klubi tjetër kolumbian nga Barranquilla, Atletico Junior, kryesonin tabelën e klasifikimit respektivisht me nga 8 dhe 6 pikë, ndërsa Riveri dhe ekipi i Sante Fe-së kishin përkatësisht nga 6 dhe 2 pikë. Në mënyrë të kuptueshme, pa asnjë lojtar rezervë në dispozicion dhe me një portier titullar si Enzo Perez, që për më tepër ishte edhe me probleme fizike, reaguan edhe bookmakers-at, që e zbritën koeficientin e skuadrës mike nga 10 në vetëm 1,3.
Enzo Perez, që ishte gjithashtu titullar edhe me përfaqësuesen, në finalen e madhe të stadiumit “Maracana”, në Kupën e Botës së vitit 2014 Gjermani – Argjentinë, tha se pas këshillave të marra nga portierët e tjerë të ekipit shfrytëzoi pikën e bardhë të 11-metërshit si pikë referimi, për t’u orientuar dhe ruajtur pozicionin si dhe koordinatat e portës.
Në “Estadio Antonio Vespucio Liberti”, siç quhet ndryshe Stadiumi Monumental i Buenos Airesit “milionerët” shënuan dy herë që në gjashtë minutat e para të takimit, me anë të mbrojtësit Fabrizio Angileri dhe sulmuesit të ri, Julian Alvarez, ndërsa golin e vetëm Enzo Perez e pësoi 17’ para fundit nga mesfushori Kelvin Osorio.
Një fitore e madhe që e katapultoi klubin e katërt më të suksesshëm në historinë e Kupës Libertadores drejt e në vendin e parë në grup, pozicion të cilin klubi i mirënjohur argjentinas ka mundësinë për ta ruajtur javën e ardhshme, në takimin përmbyllës, nëse River Plate do të sigurojë një rezultat pozitiv në shtëpi në sfidën direkte me Fluminensen.