Në një kohë kur të gjithë presin që Kamza të forcohet për startin e sezonit të ri, klubi nga periferia e kryeqytetit bën një lëvizje të papritur në dalje. Drejtuesit e skuadrës vendosën të mbyllnin bashkëpunimin me mbrojtësin Igor Çukoviç.Prishja e kontratës erdhi si një rrufe në qiell të hapur, edhe sepse malazezi firmosi rinovimin vetëm tre javë më parë. Madje, Çukoviç ishte ndër të parët lojtarë që u konfirmuan pas sigurimit të mbijetesës, duke krijuar idenë se Kamza do të ruante një pjesë të boshtit të skuadrës, për të arritur objektivat edhe në këtë edicion.Ndërprerja e marrëdhënies me Çukoviç u njoftua nga vetë klubi, nëpërmjet një deklarate për shtyp, ku e falënderoi 25-vjeçarin për kontributin e dhënë, duke i uruar edhe suksese në vazhdimësi të karrierës.Igor Çukoviç u afrua te Kamza në merkaton e janarit, duke zëvendësuar kroatin Fushtar. Paraqitjet ishin bindëse dhe malazezit i’u ofrua rinovimi, për ta kthyer menjëherë në pjesë të rëndësishme të ekipit të trajnerit Devolli. Por, tashmë situata ndryshoi dhe përveç alternativave në thuajse çdo repart, në merkato ekipit i duhet të gjejë edhe një tjetër mbrojtës që jep garanci.
