Ivan Juriç u shkarkua nga pankina e Genoas, pas humbjes në derbi ndaj Sampdorias, por edhe një serie rezultatesh negative, me vetëm 6 pikë në 12 javë kampionat.
Gjithsesi, kroati duket se nuk do të rrijë gjatë pa punë, madje mund të rikthehet të trajnojë që nga dita e mërkurë. Mediat kroate e lidhin të ardhmen e tij me klubin e Hajdukut të Splitit, që sot shkarkoi trajnerin Joan Carrillo dhe ka marrë kontakte me ish teknikun e Genoas.
Ivan Juriç ka nisur karrierën e tij si futbollist pikërisht te Hajduku dhe gëzon raporte të mira me drejtuesit e këtij klubi, por ditën e nesërme pritet të mbahet takimi i parë zyrtar mes palëve.
Te Hajduku i Splitit aktivizohet edhe mbrojtësi nga Kavaja, Hysen Memolla, që u grumbullua në kombëtaren shqiptare për herë të parë nga trajneri Cristian Panucci, në muajin shtator të këtij viti.