Ende pa u shuar jehona e shkarkimit nga drejtimi i stolit të Milanit, një tjetër lajm ka filluar të qarkullojë për Vincenzo Montellën. Mediet italiane e lidhin të ardhmen e ish teknikut të kuqezinjve, me stolin e kombëtares italiane të futbollit.
Siç pranoi edhe Marcelo Lippi në një intervistë, Montella ishte kontaktuar edhe më herët nga Federata Italiane e Futbollit, por atëherë Tavecchio vendosi t’i besojë Gian Piero Venturës.
Me Ancellotin që refuzon të pranojë stolin e të kaltërve, në pritje të ofertave nga klube të mëdha europiane, Montella është emri më i mundshëm për të marrë drejtimin e Italisë. Federata italiane do të kërkojë t’ia besojë skuadrën përfaqësuese, një trajneri me eksperiencë të madhe, për të mos rrezikuar si me Venturën dhe emrat e tillë aktualisht janë të angazhuar në klube të ndryshme dhe nuk kanë si prioritet kombëtaren.
Nga ana tjetër, Montella ka eksperiencën e duhur për të drejtuar kombëtaren dhe pas shkarkimit nga Milani, stoli i ‘Axurrëve’ do të ishte i duhuri për të synuar ringritjen e karrierës së tij si trajner, pasi vështirë se ndonjë klub i madh do t’i besonte në këto momente.
Të gjitha këto arsye, i çojnë mediet italiane në përfundimin se do të jetë pikërisht Vincenzo Montella, personi që do të drejtojë kombëtaren italiane, duke filluar që nga muaji mars i vitit të ardhshëm.