Edhe këtë të shtunë, ashtu si çdo fundjavë, Supersport do të vijë me një kalendar mjaft të ngjeshur aktivitetesh sportive, duke filluar që nga ora 15:00, kur Udinese do të përballet me Spalin në Friuli, në një sfidë që vlen mbijetesën për bardhezinjtë.
Po nga kampionati italian, do të vijnë edhe dy takimet e tjera të ditës së sotme, ku në orën 18:00, një tjetër skuadër që lufton për mbijetesë, Genoa do të presë në shtëpi Cagliarin, një tjetër skuadër që vijon të militojë në zonën e ftohtë të renditjes.
Në mbrëmje vëmendja do të jetë në Emilia Romagna, ku Sassuolo do të presë Romën e Claudio Ranierit. Vendasit kanë siguruar mbijetesën dhe nuk kanë asnjë motivim në dy javët e mbetura të kampionatit, ndryshe nga Roma që vijon ende të shpresojë për një vend në zonën Champions.
Megjithatë vitet e shkuara kanë treguar se Sassuolo është një skuadër që nuk toleron, ndërsa e fundit që e ka vuajtur, ka qenë Interi në sezonin e kaluar, pasi humbi në shtëpi 0-1, në javën e parafundit të kampionatit, duke komplikuar rrugën drejt Championsit.
Një tjetër përballje interesante, që do të vijë në ekranin e Supersport 1, duke filluar që nga ora 18:00, do të jetë edhe finalja e FA Cup, trofe që do të diskutohet mes Manchester City-t dhe Watfordit.
Vetëm 6 ditë pasi ngritën titullin kampion për herë të dytë radhazi, të besuarit e Pep Guardiolës do të tentojnë sot që të marrin një tjetër trofe, për të zbutur sadopak zhgënjimin që u la dështimi për të disatën herë në Ligën e Kampionëve.
Sfida tjetër që do të vijë në ekranin e Supersport, do të jetë ajo e kampionatit francez, ku Paris Saint Germain do të presë në “Parc Des Prince” Dijonin, që ndryshe nga kryeqytetasit, do të synojë 3 pikët sot, për të tentuar mbijetesën.