Paulo Dybala ka qenë një objektiv i hershëm i katalanasve. Madje gjatë merkatos që lamë pas u fol shpesh për një transferim të mundshëm të argjentinasit në radhët e “blaugranave”. Oferta ishte konkrete, por drejtori i përgjithshëm i Juventusit, Beppe Marotta, në shumë raste është shprehur i prerë në lidhje me këto zëra. Dybala nuk ikën, pavarësisht shumës që mund të ofrohet për të. Në muajt në vazhdim drejtuesit “bardhezi” do të bëjnë cmos për ta blinduar numrin 10. Nisur nga ky fakt, Barcelona tashmë është vënë në ndjekje të një tjetër sulmuesi, Antoine Griezmann të Atletico Madridit. Sipas mediave spanjolle, qëllimi i “blaugranave” është që t’ia shkëpusin Atleticos “yllin” e skuadrës përpara fillimit të botërorit në Rusi. Momentalisht, francezi ka klauzolë largimi 200 milionë euro, por që qershorin e ardhshëm do të reduktohet në 100 milionë, shumë kjo mëse e pranueshme për një futbollist të klasit të Griezmann. Los Colchoneros duket se tashmë i janë dorëzuar idesë që sulmuesi nuk do të jetë më pjesë e skuadrës sezonin e ardhshëm, pasi edhe United ka shfaqur interesim konkret për 26-vjecarin. Sidoqoftë, pista e Premier League është opsioni që kuotohet më pak, pasi dëshira e Griezmann është të vazhdojë aventurën në La Liga.
