Interi po shfrytëzon orët e fundit të merkatos për të sjellë edhe një mesfushor nën urdhrat e Simone Inzaghit, në mënyrë që të kompletojë organikën për sezonin e ri.
Emrat e përfolur janë të shumtë, duke nisur nga Maxime Lopez, e për të vijuar me Tanguy Ndombele apo Davy Klaasen e Donny Van de Beek, dy holandezë që i janë ofruar Interit në orët e fundit.
Giuseppe Marotta pranoi negociatat dhe preferoi të mos përmendë emra, por nëpërmjet fjalëve të tij dërgoi një sinjal se i përzgjedhuri i Interit do të jetë njëri mes Klaasen e Ndombele.
“Kam folur me Ausilion dhd ai po punon për të sjellë edhe një mesfushor. Kemi disa alternativa dhe duam të përzgjedhim dikë me cilësi ndryshe nga ata që kemi në organikë, por nuk do të përmend emra”, deklaroi Marotta.
Nëse sheh mesfushorët në organikën e Interit, vërehet qartë që mungon një futblllist shtatlartë dhe i fortë fizikisht, cilësi këto që i ka Ndombele, por edhe Klaasen, që me 180 centimetrat e tij, ka treguar se ështs i fortë në luftën në ajër dhe di të shënojë gola.
