Refik Halili u bind, i besoi stolin për vijimin e kampionatit dhe tifozët e kanë pritur mirë këtë lajm. Vetë Egbo, për Top Channel, tregoi se vendimi i klubit nuk ndryshon aspak planet e tij për të ardhmen.
“Mendoj që nuk kanë ndryshuar planet. Klubi më ka dhënë besim për të vazhduar drejtimin e Tiranës si trajner i parë. Duke biseduar, së bashku me presidentin menduam të vazhdojmë planin ashtu siç dëshiron zoti”.
Por çfarë mendon të ndryshojë Egbo tek skuadra në vijim, skemën apo futbollistët?
“Unë u kam thënë lojtarëve që nuk kemi për të ndryshuar shumë gjëra, sepse i kemi kualitetet brenda skuadrës. Objektivat e mi janë ato të klubit. Dëshira është të fitojmë sa më shumë ndeshje e në fund të bëjmë llogaritë’’.
Në fund, elozhet për një talent si Ernest Muçi, që në këto ndeshje të Egbosë në drejtim ka shfaqur cilësi dhe mbi të gjitha është treguar vendimtrar, nuk munguan, megjithatë ka dhe një këshillë për të.
‘’Çdo lojtar në ekip është shumë i rëndësishëm, Muçi është një talent që i nevojitet klubit të Tiranës. Të jesh sulmuesi i parë i Tiranës nuk është diçka e thjeshtë për t’u bërë. Nuk mjaftojnë 2-3 ndeshje të mira për të menduar se ke arritur çdo gjë. Ai duhet të qëndrojë me këmbë në tokë, të punojë shumë që të arrij më lart në aspektin personal.’’