Risia e listës së trajnerit të Kombëtares Shqiptare, Christian Panucci, është emri i Egzon Binakut. Mbrojtësi që aktivizohet me Malmoen është i panjohur për publikun shqiptar, pasi nuk është përmendur më parë për një afrim të mundshëm në përfaqësuesen kuqezi. Profili i tij, edhe pse i panjohur, është disi interesant dhe me shumë perspektivë për të ardhmen.
I lindur në Suedi më 27 gusht 1995 nga prindër kosovarë, Binaku karrierën e nisi tek IFK Amal, skuadra e qytetit të tij të lindjes. Sapo mbushi 19 vjeç, mëngjerashi ra në sy të Hacken, klub i elitës së futbollit suedez, që në vitin e parë i dha mundësinë e aktivizimit në plot 11 ndeshje për një total prej 478 minutash, ku arriti të shënonte golin e parë në karrierë pikërisht ndaj Malmoes. Në vitin 2016 sezonin e ndan midis dy skaudrave, Hacken dhe Ljungskile, me të cilën luajti si i huazuar në vetëm një ndeshje.
Por në sezonin e kaluar Binaku arriti kulmin me Hacken, ku u aktivizua në 22 ndeshje për një total prej 1507 minutash, teksa 15 takime i ka nisur si titullar. Nga janari i këtij viti ai u bë pjesë e Malmoes, në një operacion që kapi shifrën e 910 mijë eurove, dhe deri më tani ka luajtur 10 ndeshje në 11 javë kampionat, 5 prej të cilave si titullar.
Në rang ndërkombëtar Egzon Binaku ka luajtur vetëm një ndeshje me përfaqësuesen e 21-vjeçarëve të Suedisë, në eliminiatoret e “Euro 2017” të kësaj grupmoshe ndaj Sllovakisë në qershor të atij viti. Në miqësoret ndaj Kosovës dhe Ukrainës pritet me interes paraqitja e numrit 3 të Malmoes me trajnerin Christian Panucci që do të marrë përgjigjet e duhura mbi cilësitë e 22- vjeçarit.
