- Pasi arkëtoi 60 milionë euro nga Real Madridi për Luka Jovicin, Eintracht Frankfurti nuk vonon të gjejë pasuesin e sulmuesit, i cili do të jetë sërish nga Serbia. Drejtuesit e klubit gjerman bënë të ditur se kanë nënshkruar me 19-vjeçarin Dejan Joveljiv nga klubi i njohur i Yllit të Kuq të Beogradit. Operacioni është mbyllur për 4 milionë euro, teksa sulmuesi i ri ka firmosur kontratën me Eintrachtin për 5 sezonet e ardhshme.
- Aventura e Milan Badelj te Lazio është drejt fundit. Mesfushori kroat nuk ndihet protagonist në skuadrën e Simone Inzaghit, i cili preferon më shumë në pozicionin e tij brazilianin Lucas Leiva, ndaj dhe po shikon për një ekip të ri. Pas vetëm një viti, gjatë të cilit koleksionoi 1100 minuta në total, Badelj synon kampionatin spanjoll ose atë anglez, ndërsa në Itali janë shumë pak ekipe që mund të ofrojnë 8-9 milionë euro për lojtarin 30-vjeçar.
- Me zyrtarizimin e Fonsecas në stol, tani nis edhe merkatoja për Romën. Edhe pse do të ketë lëvizje mes drejtuesve, ku pritet largimi i Francesco Tottit, afrimi i lojtarëve nuk do të ndalet për të përforcuar çdo repart. Në portë Olsen është me valixhet në duar, pasi nuk ka bindur në sezonin e parë dhe, pavarësisht që ka apo jo oferta, do të vijë një tjetër lojtar, i cili mund të jetë Pau Lopez. Për 24 vjeçarin Roma ka bërë një ofertë prej 20 milionë euro e cila është refuzuar nga drejtuesit e Real Betisit, të cilët e konsiderojnë për momentin të pashitshëm, duke parë se Lopez ka vetëm një sezon që ka ardhur nga Espanyoli.
