El Clasico merr skenën këtë të diel. Barcelona dhe Real Madrid, dy rivalët e përjetshëm zbresin në fushën e “Spotify Camp Nou” për të matur forcat në javën e 26-të të La Liga-s. Katalanasit e shohin veten 9 pikë mbi “Los Blancos”.
Në fazën e parë, skuadra e Ancelotit arriti që të fitonte me rezultatin 3-1, por në vijimin e kampionatit skuadra e Xavit ka bërë më pak gabime, duke marrë arratinë në krye të klasifikimit.
Barcelona do të kërkojë që të “vrasë” kampionatin, pasi e di mirë që një fitore ndaj rivalëve më të afërt do ta bënte diferencën me vendin e dytë shumë të madhe. Për të mos thënë të parikuperushme për “Los Blancos”.
LEXO EDHE:
- Zyrtarizohet lista për Poloninë, ja risitë e Sylvinhos
- Shorti i Championsit, përplasje “gjigantësh” në çerekfinale
- “Çfarë problemi keni me rezultatin 1-0”, Xavi para El Clasicos: Nuk e ndryshojmë stilin!
- VIDEO/ Sylvinho e bën me krahë, Jasir Asani realizon tripletë
Reali në krahun tjetër, do e bënte garën për titullin maksimalisht interesante nëse do të arrinte të merrte maksimumin e pikëve në transfertë.
Benzema ka patur shqetësime në ditët e fundit duke qenë në diskutim për aktivizimin. Te Barça, Dembele dhe Pedri janë ata që nuk e lënë të qetë Xavin. Sytë do të jenë dhe tek Lewandowski, i cili është shënuesi më i mirë i kampionatit me 15 gola.
Por në javët e fundit, bomberi polak e ka humbur shkëlqimin e tij, por do të tentojë ta rigjetë ritmin dhe festën e golit ndaj Realit. Sulmi më i mirë do të jetë përballë mbrojtjes më të mirë.
Skuadra e Carlo Ancelottit ka shënuar 50 gola deri më tani. Në krahun tjetër, Barcelona është ndëshkuar vetëm 8 herë, por 3 prej këtyre golave ia ka shënuar Reali.
Një sfidë ku të dyja skuadrat janë në udhëkryqin e kampionatit. Barcelona do fitoren e qetësisë, Reali kërkon suksesin për të tentuar të mbrojë fronin e kampionit.
Dueli i përjetshëm në Spanjë fillon prej orës 21:00 dhe do të transmetohet në SuperSport 2.
