Tërbuni ka mbetur pa trajner, pasi Elvin Beqiri, i cili më parë ka drejtuar edhe Shqipërinë U19, është larguar nga pukjanët. Për shkodranin Tërbuni ishte klubi i parë si trajner dhe tashmë duhet pritur të mësohet se kë do të drejtojë në vazhdim.
“KF Tërbuni njofton të gjithë tifozët pukjanë se ka ndërprerë bashkëpunimin me trajnerin Elvin Beqiri, për arsye personale të trajnerit, që padyshim të gjithë i respektojmë! Tekniku 41-vjeçar u emërua në krye të klubit tonë në korrikun e vitit 2021, duke qëndruar për një sezon tek ne.
Nën drejtimin e trajnerit Beqiri ekipi ynë regjistroj 12 fitore, 11 barazime dhe 10-të humbje. Me këto rezultate e mbyllëm në vendin e pestë në Kategorinë e Parë! Dy ndeshje të humbura kanë qenë në Kupën e Shqipërisë dhe një humbje në “play-off”, pjesa tjetër i përket kampionatit!
I gjithë stafi drejtues i klubit tonë, tifozët pukjanë dhe ultras ‘Shqiponjat e Veriut’ e falënderojnë trajnerin Beqiri për gjithçka që i dha ekipit tonë në një sezon të mirë dhe plot emocionues. I urojmë gjithashtu shumë suksese në karrierën e tij dhe shpresojmë që kjo të jetë një mirupafshim dhe jo një lamtumirë!”, shkruan klubi i Tërbunit në rrjetet sociale.