Eri Lamçja një futbollist që mund të shndërrohet vlerë e shtuar për skuadrat e Kategorisë Superiore. Futbollisti elbasanas, pas vetëm 6 muajsh në IPKO Superligën e Kosovës, ndërpret marrëdhëniet me Dritën e Gjilanit, që drejtohet nga trajneri tiranas, Shpëtim Duro.
Klubi kampion në fuqi I Kosovës, ka shpjeguar në një njoftim për shtyp se “Lamçja nuk arriti që të ambientohej sa duhet me klubin dhe me marrëveshje të dyanshme janë ndarë rrugët. FC DRITA e falënderon Erin për kontributin e dhënë dhe i dëshiron suksese në karrierë.”
24-vjeçari ka eksperiencë në Kategorinë Superiore, pasi ka luajtur në Shqipëri me tri skuadra të ndryshme: me Elbasanin ku u rrit si futbollist, Teutën dhe Luftëtarin.