Sezoni i ri është fantastik për Arsenal. “Topçinjtë” po bindin në të dy kompeticonet që ata marrin pjesë, Premier League dhe Europa League. Në 12 sfida e zhvilluara deri tani, londinezët janë mundur vetëm nga Man United, ndërsa në përballjet e tjera njohin vetëm fitore.
Te Arsenal po shkëlqejnë shumë lojtarë si Saka, Martinelli , Partey, Odegaard apo Jesus por lideri i vërtetë i kryesuesve të Premier League është Granit Xhaka.
Mesfushori me origjinë shqiptare, në nëntë javët e para në Premier League ka shënuar dy gola të rëndësishëm, fillimisht përball Leicester ku “topcinjtë” triumfuan 4-2, ndërsa në derbin e Londrës së veriut Xhaka gjeti përsëri rrugën e rrjetës, me një realizim të bukur që vulosi dhe fitoren e madhe të Arsenal në derbi.
Kontrata aktuale e Xhakës përfundon në verën e vitit 2024, ndërsa mediat britanike bëjnë të ditur se kryesuesit e Premier League do t’i ofrojnë së shpejti rinovimin e kontratës.
Bisedimet janë programuar pas përfundimit të Kupës së Botës në Katar, ku Xhaka do të marrë pjesë me kombëtaren e Zvicrës.
30-vjeçari me paraqitjet e tij në sezonin e ri është bërë i preferuari i tifozëve, ku së fundmi ata e zgjodhën edhe si lojtarin e muajit shtator te ekipi i Arsenal, me 83% të votave.