Valon E’themi është largimi i radhës nga Kukësi. Sulmuesi anësor i cili te verilindorët në ndeshje të caktuara është përshtatur edhe si mbrojtës krahu, ka mbyllur pas 3 viteve bashkëpunimin me Kukësin pasi në fund të këtij sezoni i përfundoi kontrata me verilindorët. E’themi do ta vazhdojë karrierën në Poloni te skuadra e Zaglebie Lubin me të cilët ka arritur një akord tashmë dhe lajmi është konfirmuar edhe nga mediat polake. Gjithashtu mediat në këtë vend shkruajnë se Ethemi ka mbërritur në Lubin dhe së shpejti do të firmosë kontratën me klubin polak. Mesfushori u formua te Kukësi, tifozët dhe ambienti kuksian e konsiderojnë si një prodhim të tyrin, edhe pse lojtari ka ardhur në moshën 19-vjeçare, ku ish-drejtori i Kukësit, Naim Halili, e zbuloi si talent nga Mamurrasi. Pak minuta më parë lojtari njoftoi edhe zyrtarisht largimin nga Kukësi, duke shprehur vlerësim dhe mirënjohje për 3 vitet e kaluara në këtë skuadër.
