Nuk munguan emocionet dhe surprizat në ndeshjet e rradhës në Euroleague. Supersfida e mbrëmjes ishte ajo midis Panathinaikos dhe Fenerbahce, me trajnerin e turqve, Zeljko Obradovic që u rikthye në Athinë, aty ku ka fituar më shumë në karrierën e tij. Takimi u mbyll 81-69 në favor të Fenerbahce, me Nikola Kalinic që udhëhoqi të tijët me 18 pikë të realizuara. Tek klubi grek, më i miri ishte Nick Calathes, i cili shënoi 15 pikë dhe dhuroi 7 assist. Kjo ishte fitorja e 10 për ekipin e Obradovic në 11 ndeshje, dhe aktualisht gjendet në vendin e parë të renditjes së Euroleague.
Surpriza ndodhi në Spanjë, aty ku Baskonia mundi CSKA-në e Moskës 76-73. Vendasit zhvilluan një lojë të shkëlqyer në mbrojtje, ndërkohë që lojtari më i mirë për ta në këtë sfidë ishte Vincent Poirier me 18 pikë dhe 8 topa në tabelë. Tek rusët, nuk ishin të mjaftueshme 20 pikët e Alec Peters, me të gjithë skuadrën e cila zhvilloi një prej ndeshjeve më të dobëta këtë sezon.
Sukses i vështirë për Realin e Madridit në fushën e Anadolu Efes, ku ndeshja u mbyll me rezultatin 82-84. Ky ishte suksesi i 9 për kampionët në fuqi, që renditen në vendin e dytë. Ylli i tyre për këtë ndeshje ishte Gustavo Ayon, i cili shënoi 20 pikë dhe morri 11 rebound, ndërkohë tek turqit shkëlqeu Adrien Moerman me 19 pikë dhe 10 topa në tabelë.