Reali i Madridit pësoi humbjen e parë sezonale në Euroligën e Basketbollit dhe kjo i ndodhi përballë Khimkit të Moskës brenda në “WiZink Center”. 80 – 86 përfundoi kjo përballje që pa si protagonist rusin Shved me 20 pikë, 5 asit dhe 3 rikuperime. Një natë për t’u harruar për talentin Doncic të Realit të Madridit, i cili mundi të shënonte vetëm 12 pikë.
Maccabi i Tel Avivit ktheu te humbja Olimpian e Milanos me rezultatin 79 – 68. Skuadra izraelite mori kryesimin që në perdiodën e parë, duke krijuar një distancë sigurie prej 18 pikësh në fund të periodës së tretë, ndërsa ndeshja u mbyll me 11 pikë diferencë. Për Olimpian kjo ishte humbja e katërt në 5 ndeshje, ndërsa Maccabi siguroi fitoren e tretë sezonale pas 2 humbjeve radhazi.
Në “Fernando Buesa Arena” Baskonia vendase mundi të mposhtte me vetëm një pikë diferencë 85-84 Panathinaikosin, duke e bërë të pavlefshme paraqitjen e Pappas, që rezultoi më i miri me 22 pikë. Dy gjuajtje të lirA të saktë paka para se të binte gongu i siguruan suksesin e parë sezonal skuadrës spanjolle.
Fenerbahce e udhëhequr nga italiani Datome, kaloi pa vështirësi 77 – 66 Valencian, që tregoi një nivel të dobët në “Ulker Sports Arena” të Stambollit, aq sa më i miri për miqtë nga Spanja ishte San Emeterio me vetëm 11 pikë.
Në Beograd Crvena Zvezda pësoi një humbje të papritur nga Bamberg 69 – 75. Para publikut të zjarrtë vendas spikati Rochestie me 22 pikë, por loja në grup e basketbollistëve të Bamberg rezultoi me efikase, për të marrë fitoren e parë sezonale.
