Europa League/ Alarm te Skënderbeu, dëmtohet Radas
Skënderbeu do të zbresë në fushë të enjten në ‘Elbasan Arena’, ku do të përballet me kryesuesit e kampionatit zvicerian, Young Boys, në takimin e vlefshëm për fazën e grupeve të Europa League. Disa orë para sfidës, nga kampi korçar vijnë lajme aspak të mira, pasi mbrojtësi kroat Marko Radas është dëmtuar në stërvitje dhe rrezikon seriozisht pjesëmarrjen në ndeshjen e të enjtes.
Situata duket alarmante për trajnerin Ilir Daja, pasi të dëmtuar janë edhe dy qendërmbrojtësit e tjerë, Tefik Osmani dhe Bajram Jashanica. Në rast se mungesa e Radas do të konfirmohet, atëherë Skënderbeu do të ketë vetëm dy qendërmbrojtës në dispozicion, Fidan Aliti dhe i riu Bruno Lulaj, që duhet pranuar se nuk ka eksperiencën e duhur për të luajtur në nivele të tilla. 34 vjeçari Radas luan që prej vitit 2011 te Skënderbeu dhe është një nga pikat më të forta të ekipit korçar.
Ndeshja mes Skënderbeut dhe Young Boys do të luhet të enjten në orën 21:05 dhe do të transmetohet live në Supersport 2.