Estonia iu afrua shumë mrekullisë ndaj Serbisë në raundin e dytë të ndeshjeve në grupe të europianit të volejbollit, me skuadrën ballkanase që triumfoi me shumë vështirësi 3-2 me sete, me finalin që u mbyll 12-15.
Që në fillim të kësaj përballjeje u pa qartë se Serbia nuk do ta kishte të lehtë, gjithsesi në fund të setit të parë estonezët u dorëzuan 23-25.
E pabesueshmja ndodhi në setin e dytë, ku serbët u shfaqën kaotikë në lojën e tyre duke realizuar vetëm 16 pikë.
E njëjta panoramë edhe në setin e tretë të cilin Serbia e humbi 25-21.
Por pikërisht në momentin e saj më të vështirë skuadra serbe falë edhe eksperiencës më të madhe, mori frenat e lojës, duke e mbyllur setin e katërt 20 – 25.
Në setin final, pavarësisht dëshirës për të bërë surprizën e madhe, estonezët u mposhtën 12 – 15. Për Serbinë ky ishte suksesi i dytë në grup pas fitores së thellë 3-0 me Poloninë vendase.
