Javën e kaluar bëri mjaft bujë lajmi që sulmuesit danez të Nice, Kasper Dolberg i ishte vjedhur një orë dore me vlerë 70 mijë euro, brenda në dhomat e zhveshjes së klubit francez, ndërkohë që futbollisit po kryente seancën stërvitore.
Por edhe më i bujshëm ishte lajmi se danezi kishte bërë denoncim në polici dhe se hetimet e tyre zbuluan nga një kamera në ambientet e klubit, se autori i vjedhjes ishte shoku i skuadrës, talenti francez me origjinë nga Guinea, Lamine Diaby-Fadiga.
Ky i fundit pranoi se kishte kryer gjestin e turpshëm, i kërkoi falje sulmuesit Dolberg dhe i premtoi kompensimin për çmimin e orës, me qëllim që danezi të tërheqë denoncimin nga rajoni policor, pasi rrezikonte një dënim të rëndë.
I menjëhershëm ishte edhe reagimi i klubit të Nice, që vendosi t’i prishë menjëherë kontratën 18-vjeçarit, ndonëse shihej si një nga të rinjtë më premtues në qarkullim, ndërsa tashmë Lamine Diaby-Fadiga do t’i bashkohet FC Paris në Ligën e dytë franceze, aty ku luan edhe Jeremy Menez.