Do të përcaktohet sot çiftet gjysmëfinaliste të Botërorit të basketbollit të femrave që po zhvillohet në Spanjë.
Që në orën 12:30 zbret mbi parket favoritja absolute për ta fituar këtë trofe, skuadra e Shteteve të Bashkuara të Amerikës, që do të përballet me Nigerinë. Ekipi afrikan kaloi me shumë vështirësi, me vetëm një pikë më shumë Greqinë, por përballë “yje” të basketbollit amerikan të fermave duket një mision i pamundur.
Një përballje shumë interesante do të jetë ajo mes Australisë dhe Kinës, që do të zhvillohet në orën 15:00. Përfaqësuesja australiane u kualifikua në çerekfinale si kryesuese e Grupit B, ndërsa Kina fitoi derbin aziatik me Japoninë.
Në orën 18:30, do të luhet një përballje mjaft interesante mes dy përfaqësueseve europiane, Francë – Belgjikë. Ekipi belg u kualifikua si kokë grupi, ndërsa francezet eliminuan në fazën e 1/8-ave Turqinë.
Takimi i fundit çerekfinal luhet në orën 21:00 mes Spanjës dhe Kanadasë. Përfaqësuesja iberike arriti në çerekfinale pas suksesit 63-48 ndaj Senegalit, pot përballë kanadezeve, që u kualifikuan në këtë raund si të parat e Grupit A do të jetë një histori tjetër. Të gjitha takimet do të transmetohen nga Supersport.