Pas disfatës së fundit ndaj Everton, duket se edhe ky sezon mund të konsiderohet i dështuar për Manchester United. Djajtë e Kuq me shumë mundësi nuk do të mund të mbërrijnë vendin e katërt në Premier League dhe për pasojë nuk mund të luajnë në Champions League sezonin e ardhshëm.
Një dështim i tillë, ka bërë që legjenda e United, Rio Ferdinand të shpërthejë në kritika sa i takon menaxhimit të klubit dhe sidomos punës së drejtuesve në merkato teksa thekson se diferencën e bën vetëm Bruno Fernandes.
“Te United janë në rregull me pjesën logjistike, me fushat e stërvitjes dhe gjithçka tjetër, por kur sheh futbollistët mbetesh i pakënaqur. Duhen marrë edhe lojtarët e duhur në merkato dhe që i shkojnë për shtat historisë së klubit. Nëse iu hedh një sy lojtarëve të cilët janë afruar në 10 vitet e fundit te United, atëherë lind pyetja sa prej tyre janë rritur në vlerë apo janë përmirësuar?
Mendoj se diferencën e bën vetëm Bruno Fernandes, nuk mendoj se dikush tjetër ia ka dalë të lërë mbresa. Dhe këtu fajtor është trajneri, klubi, ata që merren me transferimin e futbollistëve dhe këtu ka nevojë për përmirësim të menjëhershëm. Nëse nuk ndryshon këtë mënyrë, këtë ideologji, atëherë nuk mund të ndryshojë skuadra”, u shpreh Ferdinand.