Fitore “in-extremis” e Feronikelit ndaj Ballkanit në takimin e luajtur në “Rexhep Rexhepi”, ku miqtë nga Therandë mundën të rezistonin thuajse gjatë gjithë lojës, por një pakujdesi në fazën mbrojtësi peshojë shumë në rezultatin përfundimtar.
Pjesa e parë e kësaj ndeshjeje u mbyll pa gola. Ballkani e kishte shënuar një gol, në minutën e 31-të, përmes Jetmir Topallit, mirëpo goli ishte anuluar për pozicion jashtë loje.
Autogoli i Jasharit në minutën e 89-të, pas një kombinimi të bukur mes Thaqit dhe Hotit, bëri që të shpërthente festa te skuadra e drejtuar nga Zekerija Ramadani. Nuk munguan më pare rastet në portën e Ballkanit, ku veçohet edhe goditja me kokë e Jean Cariocas (ish-lojtarit të Kukësit), që u prit nga portieri mik.
Me këtë fitore në frymën e fundit Feronikeli shkëputet me 6 pikë nga Prishtina, me ekipin bardhekaltër që zbret në orën 18:00 në “Fadil Vokrri” ku pret Lirinë e Prizrenit.