Feronikeli konfirmohet si pretendenti kryesor për titullin kampion të Kosovës, teksa sot mposhti Llapin me rezultatin 2-0 dhe nxori nga gara për kreun, skuadrën nga Podujeva.
Skuadra nga Drenasi e nisi mjaft mirë takimin dhe zhbllokoi sfidën me Hotin në minutën e 29’, ndërsa goli i dytë erdhi vetëm në minutën e 90’, i shënuar nga sulmuesi Astrit Fazliu.
Me këtë fitore, tërësisht të merituar, Feronikeli ruan kreun e renditjes me 45 pikë, dy më tepër se Prishtina e vendit të dytë dhe 7 më tepër se Llapi i vendit të tretë.
Edhe Prishtina, pas humbjes në derbi me Flamurtarin, bëri autokritikë sot përballë Lirisë së Prizrenit, duke fituar me rezultatin e thellë 4-0. Mankenda, Thaçi, Korenica dhe Hoxha shënuan për skuadrën kryeqytetase, të drejtuar nga Mirel Josa, e cila vijon të ruajë ritmin e Feronikelit, me dy pikë më pak në renditje.
Sfida tjetër e ditës së sotme, ajo e zhvilluar në stadiumin “Adem Jashari” të Mitrovicës, mes Trepçës ’89 dhe Dritës, u fitua nga vendasit me rezultatin minimal 1-0. Goli për skuadrën nga Mitrovica u shënua nga Renato Hyshmeri në pjesën e parë.