Formula 1 ngriti siparin sot me Çmimin e Madh të Australisë, teksa në pistën e Melbournit, ishte piloti finlandez i Mercedesit, Valteri Bottas, ai që arriti të përfundojë i pari garën, duke u ngjitur në majën më të lartë të podiumit.
Finlandezi befasoi kampionin në fuqi të botës, Hamilton që në nisje dhe më pas menaxhoi mjaft mirë garën, duke marrë përveç pikëve të fitores, edhe shpërblimin për xhiron më të shpejtë të realizuar.
Vetëm vendi i dytë për shokun e tij të skuadrës, Lewis Hamilton, ndërsa podiumi u plotësua me pilotin e Red Bull, Max Verstappen, i cili bëri një garë mjaft të mirë në pistën e Melbournit.
Një nisje sezoni për t’u harruar për skuadrën Ferrari, me Sebastian Vettel që nuk shkoi përtej vendit të katërt, ndërsa shoku i tij, debutuesi Leclerc u rendit në vendin e pestë me urdhër të skuadrës, pasi mund të kishte parakaluar gjermanin.