Armando Broja shfryu duke festuar e rrahur gjoksin në momentin e shënimit të golit në portën e Tottenhamit. Sigurisht që ky çast ka lumturuar edhe tifozët e Chelsea-t, pasi panë të ndëshkohej rivali ndërqytetas, si dhe të realizonte një futbollist i talentuar, që është në pronësi të bluve të Londrës.
20-vjeçari shqiptar, një sulmues me potencial të jashtëzakonshëm, nga vera e ardhshme mund të shkëlqejë në “Stamford Bridge”, për këtë arsye sa herë Broja shënon apo shfaq cilësitë e tij, ata fërkojnë duart.
Në fakt, Broja po zhvillon një sezon fantastik te shenjtorët, ku u huazua verën e kaluar nga Chelsea për të pasur minuta në këmbë. Deri tani ka shënuar 6 gola në Premier League, aq sa Ward-Prowse, e tashmë është shndërruar pikë referimi në sulm.
Tifozët e Chelsea-t, duke parë ecurinë e Brojës, janë shumë të lumtur, pasi janë të bindur që sezonin e ardhshëm do të kthehet në “Stamford Bridge”, për të shkëlqyer nën urdhrat e Thuchel.
Në reagimet e tyre në rrjetet sociale për golin e shënuar ndaj Tottenhamin, ata shkruajnë: “Broja, me atë festë, duket si lojtar i Chelsea-t. Ai është energjia e duhur për Chelsea-n.”