Pas miqësoreve dhe eliminatoreve të Kupës së Botës në muajin mars, FIFA ka përditësuar renditjen e përgjithshme të përfaqësueseve, teksa bie në sy fakti që Kombëtarja Shqiptare vijon të ruajë vendin e 66 ashtu si në renditjen paraardhëse.
Kuqezinjtë zhvilluan tre takime në muajin mars, dy prej të cilëve ndaj Andorrës dhe San Marinos i fituan, ndërsa një tjetër ndaj Anglisë e humbën, megjithatë këto rezultate nuk kanë ndikuar në renditje.
Ndërkohë ka zbritur me tre vende përfaqësuesja e Kosovës, që tani pozicionohet në vendin e 120-ë. “Dardanët” fituan miqësoren ndaj Lituanisë, por më pas humbën dy ndeshjet zyrtare ndaj Suedisë dhe Spanjës.
Renditja vijon të kryesohet nga Belgjika, e cila ndiqet nga Franca, Brazili, Anglia e Portugalia, ndërsa Gjermania pozicionohet në vendin e 12, pasi ka ndikuar jo pak edhe humbja në shtëpi ndaj Maqedonisë së Veriut.
