Roma i ka dhënë fund aventurës në Kupën e Italisë, pasi u eliminua në fazën çerekfinale të këtij kompeticioni, falë një humbjeje turpëruese në Firence, përballë Fiorentinës vendase.
Të besuarit e Piolit bënë gjithçka në perfeksion dhe përfituan maksimalisht nga gabimet e verdhekuqve, duke arritur të vulosin rezultatin final 7-1, që i kualifikon për në fazën gjysmëfinale.
Federico Chiesa ishte heroi i Fiorentinës, pasi arriti të mposhtë plot 3 herë portierin suedez të Romës, ndërsa dy herë shënoi edhe sulmuesi argjentinas Simeone dhe nga një gol shënuan Benassi dhe Muriel.
Për Romën golin e vetëm e shënoi serbi Kolarov, falë një gjuajtjeje spektakolare nga jashtë zone, që gjithsesi vlejti vetëm për sodisfaksion personal, ndërsa vlen të theksojmë se verdhekuqtë e mbyllën sfidën me 10 lojtarë, pas kartonit të kuq ndaj Edin Dzekos.
Humbja e thellë e Romës, që për më tepër vjen pas një momenti aspak pozitiv edhe në kampionat, ku të dielën Atalanta i rikuperoi avantazhin prej 3 golash, pritet të pasohet me largimin e trajnerit Di Francesco, i cili duket se ka humbur kontrollin mbi lojtarët.
Nga ana tjetër, Fiorentina vijon me punën e mirë dhe tashmë do të presë fituesen e çiftit Atalanta-Juventus, për të mësuar se cilën skuadër do të ketë përballë në fazën gjysmëfinale të Kupës së Italisë.