Fiorentina ka arritur të sigurojë shërbimet e mesfushorit kroat të Juventusit, Marco Pjaca, falë formulës së huazimit me të drejtë blerjeje.
Klubi vjollcë do t’u paguajë bardhezinjve dy milionë euro për huazimin e këtij sezoni dhe në verën e ardhshme mund të ushtrojë të drejtën e blerjes për 23 milionë euro.
Nga ana tjetër, Juventusi ka ruajtur mundësinë e riblerjes së kroatit, në ndonjë moment të dytë, duke ofruar një shifër prej 27 milionë eurosh. Krahas Pjacës, Fiorentina është në prag të mbylljes së transferimit të mesfushorit belg, Kevin Mirallas, nga Evertoni.
31-vjeçari do të vijë në formë huazimi nga klubi anglez, kundrejt dy milionë eurove, ndërsa Fiore ka ruajtur të drejtën e blerjes për 6 milionë të tjera verën e ardhshme.
Me këto dy përforcime, por edhe me ruajtjen e një pjese të mirë të boshtit të skuadrës së sezonit të kaluar, tashmë skuadra e drejtuar nga Stefano Pioli do të synojë pjesëmarrjen në kupat e Europës, të cilat i humbi vetëm në javët e fundit, në sezonin që lamë pas.