Roma mposhti në transfertë Spezian me rezultatin 0-1, teksa goli vendimtar u shënuan përtej minutës së 90. Nicolo Zaniolo fitoi një 11-metërsh dhe nga pika e bardhë Abraham i dhuroi tre pikët verdhekuqve. Por, tifozët e Spezias nuk e kanë falur Nicolo Zaniolon për mënyrën si fitoi penalltinë duke pretenduar se talenti italian ka simuluar, edhe pse shenjat në fytyrën e tij tregonin qartë se kishte marrë një goditje të rrezikshme nga kundërshtari.
Gjithsesi, për t’u hakmarrë ndaj Zaniolos, tifozët e Spezias kanë bërë një gjest vërtet për t’u dënuar duke qenë se kanë dërguar mesazhe në shkollën e motrës së lojtarit, Benedetta.
Në tualetin e shkollës së Benedettas janë shfaqur shkrime në të cilat theksohet se i vëllai i saj është një frikacak dhe një tradhëtar. Kujtojmë se Zaniolo është rritur në qytetin e Spezias dhe fansat mesa duket kanë kërkuar një tjetër sjellje nga ana e 22-vjeçarit.
Sakaq, ajo që ka publikuar aktet e dënueshme nga ana e tifozerisë së Spezias ka qenë vetë motra e Zaniolos e cila thekson se i vjen keq për njerëz të tillë dhe se ata kanë nevojë për kurim si pasojë e xhelozisë dhe urrejtjes.