Ka përfunduar pa fitues kryesfida e javës së 17 të Kategorisë Superiore, ajo mes Partizanit dhe Kukësit, e zhvilluar në stadiumin “Selman Stërmasi” të kryeqytetit.
Nën reshjet e shiut që shoqëruan takimin në pjesën më të madhe të lojës, si kryesuesit e kampionatit, ashtu edhe verilindorët dhuruan një ndeshje të luftuar shumë thuajse në çdo sektor të fushës.
Gjithsesi frika për të mos humbur ishte ajo që triumfoi përballë dëshirës për fitore, ndaj asnjë prej skuadrave nuk bëri mjaftueshëm për të dërguar topin në rrjetë, duke bërë që sfida të mbyllej në barazim 0-0.
Kukësi pati mundësi më të mira në pjesën e parë, me Reginaldon që i shkoi pranë golit, pas një gjuajtjeje me kokë, ndërsa Gega përforcoi sulmin në pjesën e dytë, por pa rrezikuar seriozisht kuadratin e Frashërit.
Vërshëllima e trefishtë e gjyqtarit kryesor Enea Jorgji bëri që skuadrat të ndajnë nga një pikë, rezultat që lë të kënaqura të dy skuadrat, pasi Partizani mbetet në krye të renditjes, tashmë me 36 pikë, ndërsa Kukësi merr vendin e dytë me 31 pikë dhe mbi të gjitha nuk humb në fushë ne rivalit direkt për titull.