Fitore identike për Ballkanin dhe Prishtinën në javën e 13-të të Ipko Superligës së Kosovës. Në Suharekë skuadra e Ismet Munishit mori sërish e vetme kryesimin e kampionatit falë suksesit 4-2 ndaj Llapit. Ballkani zhvilloi një pjesë të parë fantastike ku arriti të realizonte 4 gola, duke hipotekuar fitoren që në fraksionin e parë. Nazmi Gripshi realizoi 2 herë, ndërkohë gjetën rrugën e rrjetës edhe Ermal Krasniqi dhe i përhershmi Mirlind Daku. Me këtë fitore Ballkani shkoi në kuotën e 29 pikëve. Po 4-2, triumfoi edhe Prishtina në kryeqytet përballë Trepça ’89, me skuadrën bardhekaltër që u ngjit në kuotën e 18 pikëve. Në këtë duel për Prishtinën shënoi edhe Sabien Lilaj, me penallti, ishte pikërisht mesfushori shqiptar ai që hapi serinë e golave.
