Flamurtari është në kërkim të fytyrës së vërtetë. Vazhdimësia është ende një fjalë e panjohur, pasi kjo skuadër alternon paraqitje pozitive me performanca jo në nivelin e pretenduar, megjithatë fitorja ndaj Kastriotit i ka ndihmuar vlonjatët sidomos në aspektin psikologjik, pa anashkaluar edhe pikët që asnjëherë nuk bëjnë dëm.
Trajneri Ilir Daja është i drejtpërdrejtë dhe nuk e fsheh faktin që ende nuk ka arritur të kristalizojë një formacion ideal tek kuqezinjtë, pa diskutim i ndikuar edhe nga koha relativisht e shkurtër që i gjithë grupi stërvitet së bashku, megjithatë disa përgjigje i morri pas suksesit kundër krutanëve.
Alessio Hyseni ishte një ndër pikat më të forta në mesfushë, në golin e parë asisiti ishte i pavullnetshëm, por në rastin e golit të dytë të Torasës, veprimi i 21-vjeçarit ishte i denjë për sallonet e mëdha të futbollit europian.
Useini nuk ishte pjesë e listës së preferencave të teknikut deri përpara ndeshjes me Kastriotin, por shansin që i dha Daja, ish mesfushori i Shkëndijës së Tetovës e shfrytëzoi në maksimum. Idriz Batha duket se është ambientuar, sepse aktualisht po admirojmë të njëjtin futbollist që tek Partizani bënte diferencën.
Bushic është i domosdoshëm dhe nëse Torasa shënon dy gola në një ndeshje, ndoshta është shenjë e fatit për këtë Flamurtar, i cili mundësitë i ka reale për të shkuar larg. Formacionin ideal Daja ende nuk e ka gjetur, por nuk ka edhe shumë rrugë për të bërë drejt destinacionit të preferuar.
