Në një kampionat si ky, çështja e kreut dhe fundi i renditjes kanë marrë formë, por gara mbetet e hapur në të gjithë elementët e tjerë. Mbi të gjitha spikat beteja për vendin e dytë. Flamurtari dhe Kukësi, të shkëputura përkatësisht 13 dhe 14 pikë nga Skënderbeu i vendit të parë, i kanë dhënë jetë një lufte të fort sportive.
Me barazimin në Durrës, vlonjatët venitën disi ëndrrën drejt titullit, duke u kthyer në realitetin për të cilin trajneri Duro ka folur prej fillimit të sezonit, që kuqezinjtë nuk janë ende në nivelin e korçarëve, megjithatë e shohin veten brenda objektivave: garën për Europën.
Aktualisht Flamurtari pozicionohet në vendin e dytë, ndërsa Kukësi një shkallë më poshtë, por diferenca me vetëm një pike në renditje, bën që në 15 javët e mbetura të Kategorisë Superiore gjithçka të mbetet e hapur.
Matematika i lejon të besojnë edhe të vendi i parë, megjithatë për të qëndruar me këmbë në tokë, të gjitha forcat do të përqendrohen te marrja e rezultateve që do ti ndihmonin në arritjen e objektivit të vërtetë.
Të dyja skuadrat gjithashtu janë kualifikuar edhe në gjysmëfinalet e Kupës së Shqipërisë, aktivitet nëpërmjet të cilit do të fitonin të drejtën e një bilete drejt ndeshjeve ndërkombëtare, por ku synimi kryesor është mbyllja e sezonit me trofe.
