Ivan Perisic ka lënë pas dëmtimin dhe është rikthyer në fushë, ku tani ka për mision të bindë drejtuesit e Bayernit të Mynihut që të shpenzojnë 20 milionë euro për blerjen përfundimtare të kartonit të tij.
Sulmuesi anësor kroat shënoi golin e parë të bavarezëve në fitoren 2-1 ndaj Eintrachtit të Frankfurtit, pas një planzhoni të bukur me kokë, ndërsa pas ndeshjes mori komplimentat edhe të trajnerit Hansi Flick.
“Sa i përket të ardhmes së Perisic, të gjithë te Bayerni jemi të bindur për cilësitë që ai disponon dhe që i ka treguar edhe në fushë. Është gjithmonë gati për të dhënë kontributin e tij dhe për të ndihmuar skuadrën”, deklaroi tekniku i bavarezëve.
Ivan Perisic iu bashkua Bayernit të Mynihut verën e kaluar në huazim me të drejtë blerjeje për shifrën e 20 milionë eurove, por bavarezët kanë kërkuar një skonto nga Interi, ndërsa vendimi final pritet të merret vetëm pas përfundimit të sezonit.