Football Leaks vijon, ndërsa sot Mediapart ka publikuar një tjetër pjesë nga dosjet e shumta, duke u ndalur te regjistrimi i parregullt i lojtarëve nën moshë, ku skuadrat që rrezikojnë janë Chelsea dhe 4 klube të tjera të Premier Leagues.
Sipas publikimeve, blutë e Londrës kanë shkelur rregulloren e FIFA-s për transferimet, me futbollistin nga Burkina Faso, Bertrand Traore, i cili aktualisht është shitur te Lyoni, që prej verës së 2017-ës.
Futbollisti erdhi shumë herët në Angli, ndonëse dokumentet e transferimit u mbyllën vetëm kur ai mbushi 18 vjeç, ndërsa sipas Football Leaks, janë edhe 45 klube të tjera që kanë shkelur procedurat për blerjen e të rinjve.
Rreziku është që Chelsea dhe klubet e tjera angleze të përballen me një pezullim të merkatos për dy vite, ashtu siç u procedua me Atleticon e Madridit, para pak kohësh, për një situatë të ngjashme.