Bota e futbollit është plot me histori të çuditshme dhe rasti i Mohamed Buya Turay është një prej tyre. Lojtari, i lindur në Sierra Leone, kishte planifikuar gjithçka për t’u martuar më 21 korrik në vendin e tij pasi mbylli kontratën me Henan Songshan Longmen të Superligës Kineze. Por kalimi në Malmo FF ndryshoi gjithçka, duke krijuar një situatë surreale.
Klubi suedez i kërkoi futbollistit që të bashkohej sa më shpejt me ta sepse kampionati në vendin nordik tashmë është duke u zhvilluar dhe po ashtu kjo skuadër garon në raundet kualifikuese për fazën finale të Europa League. Në këtë situatë, Buya Turay nuk kishte zgjidhje tjetër veçse të linte gruan e tij të ardhshme, Suad Baydoun, vetëm në ditën e dasmës dhe të bashkohej me skuadrën e tij të re.
Ajo që i habiti të gjithë ishte se lojtari nuk e anuloi dasmën, por dërgoi vëllanë në vendin e tij dhe këtë detaj e zbuloi vetë Mohamed Buya Turay.
“Ne u martuam më 21 korrik në Sierra Leone. Por unë nuk isha atje sepse Malmo më kërkoi të vija më herët. Fotot i bëmë paraprakisht. Kështu që duket sikur isha atje, por nuk isha. Vëllai im duhej të më përfaqësonte në dasmë”,-tha futbollisti për mediet suedeze.
